|
|
|
 |
08.12.2009
Մտադիր են ստեղծել Հայաստան-ԱՄԷ միջկառավարական հանձնաժողով
Վարչապետ Տիգրան Սարգսյանն այսօր ընդունել է Արաբական Միացյալ Էմիրությունների արտաքին գործերի պետնախարար Անվար Մուհամեդ Գարգաշին և նրա ղեկավարած պատվիրակությանը:
Ողջունելով հյուրերին, ՀՀ կառավարության ղեկավարը կարևորել է Էմիրությունների հետ բազմաբնույթ հարաբերությունների ամրապնդումն ու խորացումը, որն արդեն իսկ շոշափելի արդյունքներ է արձանագրել հանքարդյունաբերության և անշարժ գույքի ոլորտներում:
Շնորհակալություն հայտնելով բարեմաղթանքների համար, Անվար Գարգաշը կարեկցանք է հայտնել երկրաշարժի տարելիցի առթիվ: Նկատելով, որ երկու երկրների միջև հարաբերությունները լավ ընթացք ունեն, ԱՄԷ արտաքին գործերի պետնախարարը խոսել է առևտրա-տնտեսական հարաբերությունների զարգացումը շարունակական դարձնելուն միտված ջանքերի մասին, այդ համատեքստում կարևորելով միջկառավարական հանձնաժողով ստեղծելու գաղափարը, որի իրականացմամբ հնարավորություն կստեղծվի համակարգել ձեռք բերված պայմանավորվածությունները և կյանքի կոչել փոխադարձ հետաքրքրություն ներկայացնող ծրագրերը:
Նշելով, որ երկու երկրների միջև համագործակցությունը ընդլայնվում է, ընդգրկելով նոր ոլորտներ, վարչապետ Տիգրան Սարգսյանը գոհունակություն է հայտնել Արփա-Սևան թունելի վերականգնողական աշխատանքները համաֆինանսավորելու պատրաստակամության համար, խոսել տնտեսության տարբեր ոլորտներում, մասնավորապես գյուղատնտեսության, ոսկերչության, ադամանդագործության, քիմիական արդյունաբերության, ենթակառուցվածքների, էներգետիկ և այլ բնագավառներում հնարավոր ներդրումային ծրագրերի մասին:
Կառավարության տեղեկատվության և հասարակայնության հետ կապերի վարչության տեղեկացմամբ` հյուրի խնդրանքով վարչապետ Սարգսյանը ներկայացրել է հայ-թուրքական երկխոսության վերջին զարգացումները, մտքեր են փոխանակվել տարածաշրջանի պետությունների հետ հարաբերությունների զարգացման շուրջ:
Աղբյուր` Panorama.am
|
|
|
|
