|
|
|
 |
26.02.2010
Կ. Կարապետյան. Ես որպես մենեջեր այս տարի ավելի քիչ ագրեսիվ ու հետևողական էի այս հարցում
«Մենք պրոֆեսիոնալ մոտեցում ենք ցուցաբերել «Հայռուսգազարդ» ընկերության ներկայացրած հայտին»,-գազի սակագնի բարձրացման վերաբերյալ որոշում ընդունելուց հետո նման տեսակետ լրագորղներին հայտնեց Հանրային ծառայությունները կարգավորող հանձնաժողովի նախագահ Ռոբերտ Նազարյանը: Նրա խոսքով, 4 դրամով սակագնի նվազեցումը ընկերության եկամուտը կրճատում է մոտ 2 մլրդ դրամով:
Հիշեցնենք, որ ընկերության ներկայացրած հայտի համաձայն, առաջարկվում էր 1 խմ –ի դիմաց սահմանել 136 դրամ՝ մինչև 10 հզ խմ սպառողների համար, հանձնաժողովը սակագինը հաստատեց 132 դրամ՝ գործող 96-ի փոխարեն:
Ընկերության տնօրեն Կարեն Կարապետյանը, պատասխանելով հարցին, թե գոհ է հանձնաժողովի որոշումից, ասաց. «Ես որպես մենեջեր այս տարի ավելի քիչ ագրեսիվ ու հետևողական էի այս հարցում, քան պետք էր լինել: Եթե տարբերակ լիներ գազը չթանկացնել, ապա մենք չէինք գնա այդ քայլին»,-ասաց նա: Ներկա պայմաններում հաստատված սակագնով ընկերության շահույթը կկազմի 0.6 մլրդ դրամ, որը Կ. Կարապետյանի խոսքով, թույլ չի տալիս ընկերությանը իր բաժնետերերին դիվիդենտներ վճարել:
Նա ասաց, որ սակագնի բարձրացումը պայմանավորված է չորս գործոնով՝ սահմանի վրա գազի գնի բարձրացում, դոլար/դրամ փոխարժեքի փոփոխություն, շուկայի անկում և ներդրումներ: «Գազի սակագնի բարձրացումը ընդամենը մեր արձագանքն էր այդ ազդեցություններին»,-ասաց Կարապետյանը:
Ռուսական բնական գազի գինը ապրիլի 1-ից Հայաստանի համար կթանկանա՝ գործող հազար խմ-ի դիմաց 154 դոլարի փոխարեն հասնելով 180 դոլարի:
|
|
|
|
