|
|
|
 |
15.03.2010
Գագիկ Ծառուկյան. «Էկոնոմիկայի նախարար Ներսես Երիցյանը չի տիրապետում երկրի տնտեսական վիճակին»
Այսօր լրագրողների հետ ճեպազրույցում «Բարգավաճ Հայաստան» կուսակցության նախագահ Գագիկ Ծառուկյանը հայտարարեց, որ մեր հանրապետությունում տնտեսական ճգնաժամը շարունակվում է և դեռևս չի ավարտվել: Ավելին, նրա կարծիքով, հնարավոր է, որ տնտեսական ճգնաժամի երկրորդ փուլ լինի:
Լրագրողի դիտարկմանը, թե Հայաստանի կառավարությունը, ի դեմս էկոնոմիկայի և ֆինանսների նախարարի, բազմիցս հայտարարել է, որ «Հայաստանը բարեհաջող կերպով հաղթահարել է տնտեսական ճգնաժամը», Ծառուկյանը նկատեց. «Այսօր աշխարհով մեկ ոչ մեկը չի ասել, որ ճգնաժամն ավարտված է: Այն պետությունները, որ 4 տոկոս, 6 տոկոս անկման փոխարեն, տնտեսական աճ են ունեցել, անգամ նրանք չեն համարձակվում նման հայտարարություններ անել»:
Լրագրողը պնդեց, որ էկոնոմիկայի նախարար Ներսես Երիցյանը հայտարարել է, որ Հայաստանը հաղթահարել է տնտեսական ճգնաժամը և մտել զարգացման փուլ, Ծառուկյանը ի պատասխան նշեց. «Ուրեմն ինքը տեղում չի եղել և չի տիրապետում ոչ երկրի էկոնոմիային ոչ էլ տնտեսական վիճակին»:
Մյուս հարցին, թե Ծառուկյանը նախագահ Սերժ Սարգսյանին ասե՞լ է, որ էկոնոմիկայի նախարարը «չի տիրապետում երկրի տնտեսական վիճակին», ԲՀԿ նախագահը պատասխանեց. «Երկրի նախագահը դա գիտի և համապատասխան քայլեր, ասենք, թե կատարում է: Էլի եմ ասում, որ ամեն ինչ չպիտի երկրի նախագահի վրա բարդել: Ամեն ինչ գտնելով` չպետք է վերագրել նախագահին»:
Նա նաև ասաց, որ ապրանքների ընդհանուր թանկացման պարագայում գործարար պատգամավորն էլ իր ապրանքների գները կթանկացնի: «Գործարանը մինուսով չի կարող աշխատել: Եթե ասենք, թե գազը թանկացավ, ուրեմն ամեն ինչի վրա դա ազդելու է` ապրանքներն էլ կթանկանան, տրանսպորն էլ կթանկանա, կոնյակն էլ կթանկանա, ցեմենտն էլ կթանկանա, բա իհարկե, ամեն ինչն էլ կթանկանա», -հայտարարեց Ծառուկյանը:
Լրագրողի հարցին, թե դուք չե՞ք մտածում ժողովրդի մասին, Ծառուկյանը դիմելով լրագրողին, պատասխանեց. «Ես ձեզ բոլորիդ, սիրում եմ, հարգում եմ, բայց ձեր երկու հարցին արդեն պատասխանել եմ»:
|
|
|
|
